काठमाडौं– अमेरिका र इरानबीच जारी तनाव तथा द्वन्द्व अन्त्यका लागि पाकिस्तानले कूटनीतिक पहल अघि बढाएको छ। यसैक्रममा पाकिस्तानका फिल्ड मार्सल आसिम मुनीर र गृहमन्त्री मोहसिन नक्भीले इरानको एकदिने भ्रमण पूरा गरेका छन्।

पाकिस्तानी सेनाको इन्टर–सर्भिसेज पब्लिक रिलेसन्स (आईएसपीआर)का अनुसार भ्रमणको मुख्य उद्देश्य अमेरिका–इरानबीचको द्वन्द्व अन्त्य गर्न पहल गर्नु र अवरुद्ध वार्तालाई पुनः अघि बढाउन सहयोग गर्नु थियो।

भ्रमणका क्रममा तनाव थप बढ्न नदिने, होर्मुज जलडमरूमध्य पुनः खोल्ने तथा द्वन्द्वलाई यथाशीघ्र अन्त्य गर्ने विषयमा विभिन्न चरणमा छलफल भएको आईएसपीआरले जनाएको छ।

भ्रमणका क्रममा इरानी राष्ट्रपति मसुद पेजेस्कियानले आसिम मुनीरको उपस्थितिमा अमेरिकालाई इरानप्रतिको आफ्नो भाषा र व्यवहार परिवर्तन गर्न आग्रह गरेका थिए।

मुनीरले इरानी राष्ट्रपति पेजेस्कियानसँगै सर्वोच्च राष्ट्रिय सुरक्षा परिषद्का सचिव मोहसिन रेजाई, संसद् सभामुख मोहम्मद बाघेर गालिबाफ, विदेशमन्त्री सैयद अब्बास अराघ्ची र गृहमन्त्री एस्कन्दर मोमेनीसँग भेटवार्ता गरेका थिए।

पाकिस्तानले पछिल्लो क्षेत्रीय तनाव कम गर्न मध्यस्थताको भूमिका निर्वाह गर्ने प्रयास गरिरहेको यो भ्रमणलाई महत्वपूर्ण कूटनीतिक पहलका रूपमा हेरिएको छ।