काठमाडौं– नेपाली कांग्रेसकी केन्द्रीय सदस्य तथा पूर्वसांसद कुसुम थापाले कांग्रेस नेता दीपक खड्कालाई राजनीतिक लडाइँ राजनीतिक र कानुनी लडाइँ कानुनी प्रक्रियाबाटै लड्न आग्रह गरेकी छन् ।

थापाले सामाजिक सञ्जालमार्फत खड्कालाई सम्बोधन गर्दै राजनीतिक विषयलाई पटकपटक कानुनी प्रक्रियामा लैजाने गरिएको भन्दै त्यसको सामना गर्न आफूहरू तयार रहेको बताएकी हुन् ।

उनले खड्काले आफू जेलमा रहेका बेला विपक्षी पक्षले आधिकारिकता पाएको र अहिले त्यस्तो हुन नदिन अदालतमा ‘सेटिङ’ मिलाइसकेको भन्ने अभिव्यक्ति दिएको दाबी गरेकी छन् ।

थापाले लेखेकी छन्, ‘पहिला म जेलमा भएको बेला परेकाले उनीहरूले आधिकारिकता पाएका हुन्, नत्र म मेरो मुद्दाजस्तै सेटिङ गर्थेँ । अब योपालि त्यस्तो हुन नदिन मिलाइसकैँ, फलानी-फलानो श्रीमान्लाई राति भेटेको छु, उनीहरूका मान्छे भेटिसकेँ, स्टे पनि आउँछ, आधिकारिकता पनि आउँछ’ भन्नुभएको रहेछ कहीँ कतै ।

यस्ता अभिव्यक्ति नदिन आग्रह गर्दै थापाले अदालतका कर्मचारीदेखि न्यायाधीशसम्म मिलाएको दाबी गर्दै नहिँड्न खड्कालाई चेतावनी दिएकी छन् ।

‘थाहा छ तपाईँसँग धेरै पैसा छ भन्ने एक वर्षअघि जेन-जी आन्दोलनकै बेलाको भिडियोमा देख्यौँ हामीले पनि । तर छ भन्दैमा अदालतका कर्मचारीदेखि श्रीमान्सम्म मिलाएको छु भन्दै नहिँड्नुहोला,’ उनले भनेकी छन् ।

यस्ता अभिव्यक्तिले न्यायालयप्रति सर्वसाधारणको विश्वास कमजोर पार्ने उनको भनाइ छ । ‘तपाईंको कारणले सोझा मान्छेकै न्यायालयप्रतिको विश्वसनीयता घट्छ। न्यायालयको गरिमा जोगाउने जिम्मा तपाईँ-हामी सबैको हो,’ थापाले भनेकी छन् ।