काठमाडौँ – नेपालका प्रधानमन्त्री वालेन्द्र ‘बालेन’ शाहको नेतृत्वबारे भारतीय सञ्चारमाध्यम इन्डिया टुडेले गम्भीर प्रश्न उठाएको छ। इन्डिया टुडेले सोमबार प्रकाशन गरेको एक विश्लेषणात्मक रिपोर्टमा बालेन प्रधानमन्त्री बनेको १५० दिनमै उनको राजनीतिक कमजोर हुँदै गएको उल्लेख गरेको छ।

‘हाउ नेपाल्स जेन–जी हिरो बालेन शाह लस्ट हिज पोलिटिकल साइन इन जस्ट १५० डेज’ शीर्षकको रिपोर्टमा बालेनलाई सुरुमा पुरानो राजनीतिक प्रणाली तोड्ने युवा नेताका रूपमा हेरिए पनि अहिले उनैप्रति जनअसन्तुष्टि बढ्दै गएको उल्लेख छ।

रिपोर्टले भारतबाट ल्याइने सामानमा भन्सार कडाइ, नेपाल–भारत सीमा विवादमा बालेनको अभिव्यक्ति, कूटनीतिक उतारचढाव, राइड सेयरिङ चालक गणेश नेपालीको आत्मदाह, भूमिहीनको विरोध तथा धार्मिक तनावलाई बालेन सरकारका प्रमुख चुनौतीका रूपमा प्रस्तुत गरेको छ।

त्यस्तै, संसद्‍मा बालेनको न्यून उपस्थिति र आफ्नै पार्टी राष्ट्रिय स्वतन्त्र पार्टीसँग बढ्दो दूरीलाई समेत इन्डिया टुडेले सरकारका लागि अर्को गम्भीर संकेतका रूपमा औँल्याएको छ। रिपोर्टअनुसार प्रधानमन्त्री बनेपछि बालेन प्रतिनिधिसभाका ३९ बैठकमध्ये पाँचवटामा मात्रै सहभागी भएका छन्।

कुनै समय बालेनलाई सत्तामा पुर्‍याउने युवा पुस्ता नै अहिले सडकमा आएर उनको राजीनामा मागिरहेको उल्लेख गर्दै रिपोर्टले विपक्षमा रहँदा काम लागेको टकरावको शैली सरकार सञ्चालनमा भने पर्याप्त नहुने निष्कर्ष निकालेको छ।

इन्डिया टुडेका अनुसार पाँच महिनाको छोटो अवधिले नै बालेनको ठूलो जनमत कसरी राजनीतिक संकटमा बदलिन सक्छ भन्ने देखाएको छ।