काठमाडौँ – आगामी भदौ २३ र २४ गते सरकारविरुद्ध पुनः आन्दोलन हुने भन्दै सामाजिक सञ्जालमा फैलाइएका सूचना असत्य र भ्रामक रहेको जेन्जी अभियान्ता रक्षा बमले स्पष्ट पारेकी छन्।

आफ्नो तस्बिरसमेत प्रयोग गरेर आन्दोलनबारे भ्रामक समाचार फैलाइएको भन्दै उनले सामाजिक सञ्जाल फेसबुकमार्फत त्यसप्रति ध्यानाकर्षण भएको जनाएकी छन्। सो आन्दोलनसँग आफ्नो र ‘जेन्जी फन्ट’ को कुनै सरोकार नरहेको उनले स्पष्ट पारेकी छन्।

“भदौ २३ र २४ गतेका घटना सम्झिँदा मात्रै पनि आङ सिरिङ्ग हुन्छ। ती दिनको पीडा र क्षति अझै ताजै छ,” उनले भनेकी छन्, “त्यसैले आन्दोलनजस्तो गम्भीर विषयलाई मजाक र सनसनी फैलाउने माध्यम बनाइएको देख्दा झन् दुःख लागेको छ।”

आफूहरू शान्तिको पक्षमा रहेको र हाल सरकारविरुद्ध आन्दोलन गर्नुपर्ने कुनै अवस्था नरहेको समेत उनले बताएकी छन्। संवेदनशील विषयमा तुच्छ मजाक नगर्न, नाम वा तस्बिर दुरुपयोग गरेर भ्रामक सूचना नफैलाउन र जिम्मेवार बन्नसमेत उनले सबैसँग अपिल गरेकी छन्।