विराटनगर – मोरङमा एक विद्यार्थीलाई कुटपिट गरेको आरोपमा प्रहरीले एक शिक्षकलाई पक्राउ गरेको छ ।

पक्राउ पर्नेमा झापाको गौरादह नगरपालिका–४ निवासी ३८ वर्षीय प्रकाश अधिकारी रहेका छन् । उनी मोरङको पथरीशनिश्चरे नगरपालिका–५ स्थित श्री अमरसिंह माध्यमिक विद्यालयमा अध्यापन गराउँदै आएका शिक्षक हुन् ।

प्रहरीका अनुसार साउन ६ गते बिहान करिब १०ः१५ बजे विद्यालय परिसरमै एक विद्यार्थीमाथि कुटपिट भएको भन्दै उजुरी परेको थियो । घटनामा विद्यार्थी घाइते भएपछि इलाका प्रहरी कार्यालय पथरी र अस्थायी प्रहरी पोस्ट हसन्दहबाट खटिएको टोलीले अनुसन्धान अघि बढाएको थियो।

उजुरीका आधारमा प्रहरीले शिक्षक अधिकारीलाई साउन ९ गते नियन्त्रणमा लिएको जनाएको छ । जिल्ला प्रहरी कार्यालय मोरङका सूचना अधिकारी प्रहरी नायब उपरीक्षक मकेन्द्र कुमार मिश्रका अनुसार पक्राउ परेका शिक्षकलाई इलाका प्रहरी कार्यालय पथरीमा राखी घटनाबारे थप अनुसन्धान भइरहेको छ ।