काठमाडौं– नेकपा (एमाले) का महासचिव शंकर पोखरेलले वर्तमान राजनीतिक परिवेश लोकप्रियतावाद, अराजकतावाद र अवसरवादको प्रभावमा रहेको टिप्पणी गरेका छन् । उनले यस्ता आधारमा उदाएका राजनीतिक शक्तिको उदय छिटो हुने भए पनि त्यस्तै छिटो पतन हुने दाबी गरे।

शनिबार काठमाडौंमा नरबहादुर कर्माचार्य स्मृति प्रतिष्ठानले आयोजना गरेको कार्यक्रममा बोल्दै महासचिव पोखरेलले लोकप्रियतावाद, अराजकतावाद र अवसरवादको जगमा बालेन नेतृत्वको राजनीतिक शक्ति खडा भएको उल्लेख गर्दै दीर्घकालीन रूपमा यस्ता प्रवृत्तिले स्थायित्व दिन नसक्ने बताए।

उनले राष्ट्रिय स्वतन्त्र पार्टी (रास्वपा) वा वर्तमान राजनीतिक शक्तिहरू असफल भए पनि जनमत स्वतः पुरानै दलतर्फ फर्किन्छ भन्ने सोच राख्न नहुने धारणा व्यक्त गरे। जनविश्वास कायम राख्न राजनीतिक दलहरूले आफ्ना कार्यशैली र दृष्टिकोणमा समयानुकूल सुधार गर्नुपर्ने उनको भनाइ थियो।

महासचिव पोखरेलले नेपालको वामपन्थी आन्दोलनमा अनुभवी र नयाँ पुस्ताको सहकार्य आवश्यक भए पनि पछिल्लो समय पुराना नेताहरूको मात्र प्रभाव देखिएको र परिवर्तनका संवाहक मानिएका युवाहरूको सहभागिता घट्दै गएकोप्रति चिन्ता व्यक्त गरे।

युवापुस्तालाई वामपन्थी आन्दोलनसँग जोड्न परम्परागत विचार र भाषाशैली मात्र पर्याप्त नहुने उल्लेख गर्दै उनले सूचना प्रविधिमैत्री सोच, आधुनिक वैचारिक धरातल र नयाँ राजनीतिक संवादको आवश्यकता औंल्याए।

उनले श्रमजीवी तथा मजदुर वर्गलाई रूपान्तरणको आन्दोलनसँग प्रभावकारी रूपमा जोड्न सके वामपन्थी आन्दोलन पुनः सशक्त रूपमा उदाउन सक्ने विश्वास व्यक्त गरे।