काठमाडौं- नेपाल कम्युनिष्ट पार्टी एमालेका नेता सूर्य थापाले स्थानीय चुनावमा तालमेलको दिशामा एमाले-नेकपा सहमति भएको जनाएका छन् ।

दुई पार्टीबीच भएको सहमतिपत्र सामाजिक सञ्जालमा शेयर गर्दै नेता थापाले प्रदेश सरकारमा सहकार्य, पार्टीबीच कार्यगत एकता र स्थानीय निर्वाचनमा तालमेलको दिशामा सहमित भएको जनाएका हुन् ।

शनिबार एमाले अध्यक्ष केपी शर्मा ओली र नेकपाका संयोजक पुष्पकमल दाहाल प्रचण्डबीच भएको सहमतिअनुसार दुई दलले प्रदेशसभामा संयुक्त रूपमा सरकार गठन गर्दै सत्ता साझेदारी गर्ने भएका छन् ।

दुई दलबीच भएको सहमति अनुसार कोशी प्रदेश, बागमती प्रदेश र लुम्बिनी प्रदेशमा नेकपा (एमाले) ले सरकारको नेतृत्व गर्नेछ । त्यसैगरी कर्णाली प्रदेश र सुदूरपश्चिम प्रदेशमा नेपाली कम्युनिष्ट पार्टीले सरकारको नेतृत्व सम्हाल्ने तय भएको छ ।

मधेश प्रदेश र गण्डकी प्रदेशमा भने प्रदेश सभामा प्रतिनिधित्व गर्ने अन्य राजनीतिक दलहरूसँग समेत आवश्यक परामर्श गरी सरकारको नेतृत्व तथा सहभागिताको स्वरूप तय गरिने सहमति पत्रमा उल्लेख छ ।

यद्यपि सहमतिपत्रमा स्थानीय निर्वाचनमा तालमेलबारे केही उल्लेख छैन ।