नेपालगञ्ज– बाँकेको राप्तीसोनारी गाउँपालिका–८ शम्शेरगञ्जस्थित मत्स्य विकास केन्द्रले माछाका भुरा तथा खाने माछा बिक्रीबाट राजस्वमा उल्लेख्य वृद्धि गरेको छ।

केन्द्रका अनुसार आर्थिक वर्ष २०८२-८३ मा राजस्व संकलन अघिल्लो वर्षको तुलनामा ५३ प्रतिशतभन्दा बढीले बढेको छ। आर्थिक वर्ष २०८१-८२ मा रु ३३ लाख १४ हजार ४०० राजस्व संकलन भएकोमा गत आर्थिक वर्षमा रु ५० लाख ८८ हजार ६४२ पुगेको हो।

केन्द्र प्रमुख वरिष्ठ मत्स्य विकास अधिकृत रिमबहादुर थापाका अनुसार लक्ष्यभन्दा बढी माछाका भुरा उत्पादन तथा बिक्री भएकाले राजस्व वृद्धि भएको हो।

गत आवमा ह्याचलिङ भुरा दुई करोड, फ्राई १५ लाख र फिङ्गरलिङ १२ लाख गरी कुल दुई करोड २७ लाख भुरा उत्पादन गर्ने लक्ष्य राखिएको थियो। तर केन्द्रले लक्ष्यभन्दा बढी ह्याचलिङ दुई करोड ५९ लाख, फ्राई ६३ लाख ८१ हजार ५८० र फिङ्गरलिङ २६ लाख २४ हजार ६७२ उत्पादन गरेको जनाएको छ।

अधिकृत थापाले सीमित स्रोतसाधनका बाबजुद नयाँ प्रविधिको प्रयोग र दक्ष प्राविधिक जनशक्तिका कारण उत्पादन वृद्धि गर्न सफल भएको बताए। उनका अनुसार केन्द्रले उत्पादन बढाउँदै लगे पनि बजारमा माछाका भुराको माग अझै उत्पादन क्षमताभन्दा बढी रहेको छ।

मत्स्य विकास केन्द्रको कुल तीन दशमलव ५९ हेक्टर क्षेत्रफलमध्ये एक दशमलव ८५ हेक्टर जलाशय क्षेत्र रहेको छ। भुरा उत्पादनका लागि केन्द्रमा साना–ठूला गरी २३ वटा पोखरी निर्माण गरिएका छन्।

केन्द्रले उत्पादन गरेका माछाका भुरा बाँके, बर्दिया, दाङ, पूर्वी रुकुम, प्युठान, रोल्पालगायत कर्णाली र सुदूरपश्चिम प्रदेशका विभिन्न जिल्लाका किसानलाई उपलब्ध गराउँदै आएको छ।