काठमाडौं- भारतका शिक्षा मन्त्री धर्मेन्द्र प्रधानको राजीनामा आएलगत्तै प्रमुख प्रतिपक्षी दल कंग्रेसको प्रतिक्रिया सार्वजनिक भएको छ । कंग्रेसले आफ्ना आधिकारिक सामाजिक सञ्जालमार्फत टिप्पणी गर्दै प्रधानमन्त्री नरेन्द्र मोदी ‘भारतको अतीत’ भएको र ‘अतीतले कहिल्यै भविष्यसँग लड्न नसक्ने’ उल्लेख गरेको छ ।

यसै क्रममा कंग्रेस नेता पवन खेडाले शिक्षा मन्त्रीको राजीनामा धेरै ढिलो गरी चालिएको र अपर्याप्त कदम भएको बताएका छन् । उनले प्रधानको राजीनामा आउन धेरै ढिलो भइसकेको र अझै धेरै गर्न बाँकी रहेको अर्थमा ‘अ डे लेट एन्ड अ डलर सर्ट’ भनेका छन् । उनले ढिलै भए पनि यो समस्याबाट मुक्ति मिलेकोमा भारतका जनतालाई बधाई दिएका छन् ।

मन्त्रीको राजीनामा पछि कंग्रेस अध्यक्ष मल्लिकार्जुन खड्गेले यसलाई देशका युवा र सत्यको ठूलो जितको रूपमा व्याख्या गरेका छन् । उनले भारतीय विद्यार्थीहरूको आवाज अन्ततः घमन्डी सत्ताको दैलोसम्म पुगेको र यो प्रधानमन्त्रीको हठको हार भएको बताएका छन्।