काठमाडौं – राष्ट्रिय स्वतन्त्र पार्टी (रास्वपा)को प्रथम राष्ट्रिय महाधिवेशनअन्तर्गत केन्द्रीय समिति निर्वाचनको मतदान बुधबार राति साढे १० बजेदेखि सुरु हुने भएको छ।

यसअघि राति १० बजेदेखि मतदान सुरु हुने कार्यतालिका रहे पनि प्राविधिक तथा व्यवस्थापकीय तयारीका कारण समय आधा घण्टा पछि सारिएको जनाइएको छ।

पार्टीको केन्द्रीय निर्वाचन आयोगले जारी गरेको सूचनाअनुसार मतदान प्रक्रिया बुधबार राति साढे १० बजेदेखि सुरु भई बिहीबार बिहान १० बजेसम्म सञ्चालन हुनेछ। आयोगले निर्वाचनलाई व्यवस्थित, पारदर्शी र निष्पक्ष ढंगले सम्पन्न गर्न आवश्यक सम्पूर्ण तयारी पूरा भएको जनाएको छ।

आयोगले महाधिवेशन प्रतिनिधिहरूलाई तोकिएको समयभित्र मतदान केन्द्रमा उपस्थित भई आफ्नो मताधिकार प्रयोग गर्न आग्रह गरेको छ। मतदान स्थल, डिजिटल मतपत्र तथा निर्वाचन प्रक्रियासम्बन्धी अन्य व्यवस्थाबारे प्रतिनिधिहरूलाई छुट्टै जानकारी गराइने पनि आयोगले जनाएको छ।

केन्द्रीय समिति चयनका लागि हुन लागेको निर्वाचनलाई रास्वपाको संगठनात्मक भविष्यसँग जोडेर हेरिएको छ। आयोगले निर्वाचन सफल बनाउन उम्मेदवार, प्रतिनिधि तथा सम्बन्धित सबै पक्षको सहयोग आवश्यक रहेको उल्लेख गरेको छ।