चितवन– चितवनमा जारी राष्ट्रिय स्वतन्त्र पार्टी (रास्वपा)को पहिलो महाधिवेशनमा ९९ जना केन्द्रीय सदस्यका लागि चार सयभन्दा बढीले उम्मेद्वारी दर्ता गराएका छन् ।

केन्द्रीय निर्वाचन आयोगका प्रमुख भुवन केसीले प्रथम चरणको नामावली निकाल्ने तयारी भइरहेको जानकारी दिए । उनले भने, ‘एकिन सङ्ख्या निकाल्दै छौँ, चार सयभन्दा बढीको उम्मेद्वारी परेको छ ।’ बिहान ९ बजे नामावली प्रकाशन गर्ने भनिए पनि अहिलेसम्म सार्वजनिक नहुँदा बाँकी प्रक्रिया अघि बढ्न सकेको छैन ।

निर्वाचित ९९ जना मध्येबाट पदाधिकारी चयन गरिने छ । पदाधिकारी चयन भने दोस्रो चरणमा हुनेछ । मतदानका निम्ति विद्युतीय उपकरण प्रयोग गरिने छ । विदेशमा रहेकाहरूले एपमा मतदान गर्नेछन् । मतदान गर्ने चार हजार हाराहारी प्रतिनिधि छन् ।

मतदान गर्न एक व्यक्तिका लागि कम्तीमा २० मिनेट लाग्ने विद्युतीय उपकरणका प्राविधिक नवराज पाण्डेले जानकारी दिए । प्रतिनिधि सबैले मतदान गरे कम्तीमा १५ देखि बढीमा २० घण्टासम्म लाग्ने उनको भनाइ छ ।

पार्टी सभापतिमा भने रवि लामिछाने निर्विरोध निर्वाचित भइसकेका छन् । सभापतिमा उनको मात्र एकल उम्मेदवारी परेकाले उनी निर्विरोध भएका हुन् ।