काठमाडौं – नेकपा (एमाले)को सचिवालय बैठकले वर्तमान सरकारको कार्यशैलीप्रति गम्भीर आपत्ति जनाएको छ। बैठकले सरकार स्वेच्छाचारी ढंगले अघि बढिरहेको निष्कर्ष निकाल्दै त्यसप्रति गम्भीर ध्यानाकर्षण भएको जनाएको हो ।

बैठकपछि सञ्चारकर्मीसँग कुरा गर्दै पार्टी उपमहासचिव लेखराज भट्टले पार्टी अध्यक्षबाट संगठनभित्र एकता कायम गर्न निर्देशन आएको जानकारी दिए । उनका अनुसार बैठकले पार्टी पदाधिकारीहरूको वरीयताक्रम यथावत् रहने निर्णयसमेत गरेको छ ।

बैठकमा सरकारका पछिल्ला गतिविधि, विशेषगरी अध्यादेशमार्फत शासन सञ्चालन गर्ने प्रवृत्ति, संसदीय अभ्यासको उल्लंघन तथा कुशासनतर्फ उन्मुख कदमबारे विस्तृत छलफल भएको बताइएको छ ।

एमालेले लोकतान्त्रिक पद्धति, संसदीय मूल्य–मान्यता र संवैधानिक प्रक्रियालाई कमजोर पार्ने कुनै पनि प्रयास स्वीकार्य नहुने स्पष्ट गरेको छ । साथै बैठकमा समसामयिक राजनीतिक अवस्था, पार्टी संगठन सुदृढीकरण तथा आगामी रणनीतिबारे पनि छलफल भएको पार्टी स्रोतले जनाएको छ।