काठमाडौं – नेकपा एमालेका सचिव महेश बस्नेतले अध्यक्ष केपी शर्मा ओलीको राजीनामाबारे गरिएको प्रचार भ्रामक भएको बताएका छन् ।

चौथो दिन बसेको एमाले सचिवालय बैठक सम्पन्न भएपछि सञ्चारकर्मीसँग कुरा गर्दै बस्नेतले पार्टीभित्र अध्यक्ष ओलीले राजीनामा दिने विषयमा फैलाइएका समाचारहरू गलत र पार्टी हित विपरीत भएको दाबी गरे ।

उनले भने ‘ओलीले राजीनामा दिन्छन् भन्ने हिसाबले प्रचार गरियो, यो पार्टी हित विपरीत हो। यसमा पार्टी अध्यक्षको ध्यानाकर्षण भएको छ।’ उनले वर्तमान अवस्थामा ओलीको विकल्प नभएको पनि बताए ।

बैठकमा अध्यक्ष ओलीले करिब ३ देखि ४ घण्टा नेताहरूका धारणा सुनेका थिए। सुरुमा १८ पदाधिकारीका विचार सुनेका ओलीले चार जनाबाहेक १४ पदाधिकारीले नेतृत्व परिवर्तनको पक्षमा धारणा राखेपछि अन्त्यमा आफ्ना कुरा राखेका स्रोतहरूले जनाएका छन् ।

बैठकमा नेताहरूको धारणा, संगठनात्मक विषय तथा आगामी रणनीतिबारे विस्तृत छलफल भएको बताइएको छ ।