काठमाडौं– पेट्रोलियम पदार्थमा लगाइएको कर खारेजीको माग गर्दै चितवनमा युवाहरूले अनौठो शैलीमा विरोध प्रदर्शन गरेका छन् ।

नेपाल आयल निगमले पेट्रोलियम पदार्थमा निरन्तर रूपमा गरिरहेको मूल्यवृद्धिको विरोधमा आज जेन-जी अभियन्ता मिराज ढुंगानाको नेतृत्वमा ‘गरी खान देऊ’ चितवन शाखाले मोटरसाइकल तथा स्कुटर नचढाई हातले डोर्‍याएर विरोध र्‍याली निकालेको हो ।

‘पेट्रोलियम पदार्थमा ६ कर माफ अभियान’ अन्तर्गत आयोजित र्‍याली चौबीसकोठी चोकबाट सुरु भई लायन्सचोकमा पुगेर समापन भएको थियो । कार्यक्रममा सहभागी युवाहरूले ‘गरी खान देऊ’ र ‘महँगीको मारमा सुशासन फरार’ लगायतका नारा लेखिएका प्लेकार्ड तथा ब्यानर बोकेका थिए ।

आन्दोलनकारीहरूले सर्वसाधारणलाई महँगीको चर्को मारबाट राहत दिन सरकारले पेट्रोलियम पदार्थमा लगाउँदै आएका विभिन्न शीर्षकका ६ वटा कर तत्काल खारेज वा कटौती गर्नुपर्ने माग गरेका छन् ।

माग पूरा नभए आन्दोलनलाई थप सशक्त बनाइने चेतावनी समेत आयोजकले दिएका छन् ।

तस्बिर : नेपाल फोटो लाइब्रेरी