काठमाडौं– स्वतन्त्र नागरिक अभियान नेपालले देशमा सुशासन, पारदर्शिता, सामाजिक न्याय र आत्मनिर्भर अर्थतन्त्र निर्माण गर्ने लक्ष्यसहित विस्तृत ३३ बुँदे प्रतिबद्धता सार्वजनिक गरेको छ ।

वरिष्ठ पत्रकार ऋषि धमलाको नेतृत्वमा काठमाडौँमा आइतबार एक कार्यक्रमको आयोजना गर्दै स्वतन्त्र नागरिक अभियान नेपालको घोषणा गरेको हो । 

सो अभियानले भ्रष्टाचार, नातावाद, दण्डहीनता तथा राजनीतिक स्वार्थकाविरुद्ध उभिँदै नागरिक अधिकार, सम्मान र भविष्यको सुनिश्चितताका लागि साझा जनअभियान अगाडि बढाउने जनाएको छ । 

कार्यक्रममा बोल्दै ऋषि धमलाले देशभर रहेका पीडित नागरिकलाई न्याय दिलाउन र सरकारलाई सुशासन तथा विकासका लागि दबाब दिन अभियान सुरु गरिएको बताए ।

उनले जेन-जी आन्दोलनका घाइते तथा पीडितहरूको अवस्था अझै दयनीय रहेको उल्लेख गर्दै उनीहरूको माग सम्बोधन गर्न सरकारसँग आग्रह गरे ।

कार्यक्रममा नागरिक अगुवा कृष्ण पहाडीले लोकतन्त्र र स्वतन्त्रताको रक्षा गर्न नागरिक समाज सचेत हुनुपर्नेमा जोड दिए । उनले सामाजिक न्यायको मुद्दालाई अझ सशक्त रूपमा उठाउनुपर्ने धारणा राखे ।

त्यस्तै राजनीतिक विश्लेषक सुरेन्द्र केसीले अभियानलाई स्पष्ट एजेन्डा र योजनासहित अघि बढाउनुपर्ने बताए । समाजले वैकल्पिक राजनीतिक खोजी गरिरहेको उल्लेख गर्दै केसीले नाराभन्दा व्यवहारिक काम आवश्यक रहेको धारणा राखे ।

अभियानले भ्रष्टाचारमुक्त शासन व्यवस्था, छिटो न्याय प्रणाली, डिजिटल सुरक्षा, कृषि तथा उद्योग संरक्षण, युवालाई उद्यमशीलतामा प्रोत्साहन र आत्मनिर्भर अर्थतन्त्र निर्माणलगायतका एजेन्डा अघि सारेको छ ।