काठमाडौं- नेपाली कांग्रेसका नेता एनपी साउदले सभापति गगन थापासँग पार्टीमा मेलमिलापका लागि विशेष अधिवेशनमा सहभागी नभएका नेताहरूसँग समन्वय गर्न आग्रह गरेका छन् ।

कांग्रेस सुदूरपश्चिम कार्यसमितिले आइतबार कैलालीको धनगढीमा आयोजना गरेको प्रदेशस्तरीय भेलामा उनले पार्टी एकतामा जोड दिँदै सभापति थापालाई समन्वयका लागि आग्रह गरेका हुन ।

‘अधिवेशनमा नगएका साथीहरूबीच समन्वय र एकता स्थापित गर्नस्’, भेलाका प्रमुख अतिथि साउदले भने, ‘क्रियाशील सदस्यताबारे थप विवाद नगर्नुस् ।’

कुनै कृयाशील सदस्यले अनुशासन तोडे कारबाही गर्ने प्रक्रिया पार्टीको विधानले नै तय गरिसकेको उनले बताए ।

‘त्यो प्रक्रियाअनुसार सम्बन्धित मान्छेलाई हटाउन सकिन्छ,’साउदले भने, ‘सर्वसम्मतिले सदर भएको क्रियाशील सदस्यता तपाईंले चलाउनु हुन्न । हामी यो पनि आग्रह गर्न चाहन्छौं ।’

पूर्वपरराष्ट्रमन्त्री साउदले पार्टीको निर्वाचन समिति सबै पक्षलाई स्वीकार्य हुने गरि अगाडि बढाइनु पर्ने पनि माग गरे । ‘निर्वाचन समिति बनाउने, अनुशासन समिति पनि सर्वस्वीकार्य हुने गरि बनाउनु पर्छ,’ उनले भने ।

विशेष अधिवेशनमा सहभागी र असहमतबीच एकता र समन्वयपछि मात्रै १५ औँ महाधिवेशन गर्न सकिने नेता साउदको तर्क छ ।