काठमाडौं– स्वास्थ्य तथा जनसंख्या मन्त्रालयले विश्व खोप सप्ताहको अवसर पारेर ‘पूर्ण खोपः सुरक्षित भविष्य’ भन्ने नारासहित देशभर सचेतना अभियान सञ्चालन गरेको छ ।

मन्त्रालयले सार्वजनिक गरेको सूचना अनुसार वैशाख ११ देखि १७ गतेसम्म विश्व खोप सप्ताह मनाइँदै छ । अभियानमार्फत जन्मेदेखि १५ महिनासम्मका बालबालिकालाई १३ प्रकारका रोगविरुद्धका खोप निःशुल्क उपलब्ध गराइने जानकारी दिइएको छ ।

सरकारले देशभरका स्वास्थ्य संस्थामार्फत नियमित खोप सेवा विस्तार गर्दै बालबालिकालाई पूर्ण खोप सुनिश्चित गर्न विशेष जोड दिएको छ । मन्त्रालयका अनुसार खोप कार्यक्रमले बालमृत्युदर घटाउन तथा संक्रामक रोगको जोखिम कम गर्न महत्त्वपूर्ण भूमिका खेलेको छ ।

अभियान अवधिमा अभिभावकलाई आफ्ना बालबालिकालाई समयमै खोप लगाउन आग्रह गरिएको छ । साथै, खोप सुरक्षित र प्रभावकारी भएको सन्देश प्रवाह गर्दै भ्रम र हिचकिचाहट हटाउन स्वास्थ्यकर्मी तथा सञ्चारमाध्यमको सक्रिय भूमिका आवश्यक रहेको मन्त्रालयले जनाएको छ ।

मन्त्रालयले पूर्ण खोप सुनिश्चित गर्नु सुरक्षित र स्वस्थ भविष्यका लागि अपरिहार्य भएको उल्लेख गर्दै सबै सरोकारवालालाई अभियानमा साथ दिन आह्वान गरेको छ ।