काठमाडौं– वैशाख १ देखि ११ गतेसम्म देशभर विभिन्न प्रकृतिका विपद्का ३५० घटना दर्ता भएका छन् । 

ती घटनामा परी २० जनाको मृत्यु भएको छ भने ६६ जना घाइते भएका छन् । यस अवधिमा ५०३ परिवार प्रभावित भएको विपद् जोखिम न्यूनीकरण तथा व्यवस्थापन प्राधिकरणको तथ्यांकले देखाएको छ ।

तथ्यांक अनुसार सबैभन्दा बढी घटना आगलागीका रहेका छन् । ११ दिनमा मात्रै २०७ आगलागीका घटना हुँदा ६ जनाको ज्यान गएको छ भने २२ जना घाइते भएका छन् । आगलागीकै कारण २ सय ४२ परिवार प्रभावित भएका छन् । सुख्खा मौसम, बढ्दो तापक्रम र हावाहुरीका कारण आगलागीका घटना उच्च देखिएको सरोकारवाला निकायको भनाइ छ।

त्यस्तै, वन डढेलोका घटना पनि उल्लेखनीय रूपमा बढी देखिएका छन् । यस अवधिमा १०७ वटा वन डढेलो लागेका छन्, जसबाट १७ परिवार प्रभावित भएका छन् । त्यस्तै यो अवधिमा बाढीका २८ घटनामा ४ जनाको मृत्यु र ७ जना घाइते भएका छन् । चट्याङका ९ घटनामा ३ जनाको मृत्यु र ४ जना घाइते, सर्पदंशका १८ घटनामा १ जनाको मृत्यु र १७ जना घाइते भएका प्राधिकरणको तथ्यांकमा उल्लेख छ । 

लेक लाग्ने २ घटनामा १ जना, डुबानका ९ घटनामा २ जना, पहिरोका २ घटनामा १ जनाको मृत्यु भएको प्राधिकरणले जनाएको छ ।