काठमाडौं– स्वास्थ्य बीमा बोर्डले सेवा प्रवाहलाई सहज र प्रभावकारी बनाउन स्वास्थ्य बीमा सम्बन्धी डिजिटल कार्डको प्रयोग अनिवार्य गर्न सेवा प्रदायक स्वास्थ्य संस्थाहरूलाई निर्देशन दिएको छ ।

बोर्डले जारी गरेको सूचनाअनुसार, बिरामीसँग भौतिक बीमा कार्ड नभएको अवस्थामा पनि नागरिक एप वा  एच आइ बी प्रोफाइलमा रहेको डिजिटल कार्डमार्फत क्यूआर कोड स्क्यान गरी सेवा उपलब्ध गराउनुपर्ने व्यवस्था गरिएको छ । 

यससम्बन्धी निर्णय २०८० फागुन २४ गते बसेको बोर्ड बैठकबाट भइसकेको र सोही आधारमा परिपत्र समेत जारी गरिएको जनाइएको छ ।

तर केही स्वास्थ्य संस्थाहरूले डिजिटल कार्डमार्फत सेवा नदिएको गुनासो आएपछि बोर्डले उक्त व्यवस्था कडाइका साथ कार्यान्वयन गर्न पुनः निर्देशन दिएको हो । अब सबै सेवा प्रदायक संस्थाहरूले डिजिटल कार्डलाई अनिवार्य रूपमा स्वीकार गरी बीमितलाई सेवा दिनुपर्ने बोर्डले स्पष्ट पारेको छ ।

वरिष्ठ मेडिकल सुपरिन्टेन्डेन्ट डा। पवन कुमार साहद्वारा हस्ताक्षरित सूचनामा बीमितको सुविधालाई प्राथमिकतामा राख्दै प्रविधिमैत्री सेवा प्रवाह सुनिश्चित गर्न आग्रह गरिएको छ ।

यस निर्णयसँगै स्वास्थ्य बीमा सेवा थप सहज, छिटो र कागजरहित हुने अपेक्षा गरिएको छ ।