काठमाडौं- सभापति गगनकुमार थापाले नेपाली कांग्रेस केन्द्रीय कार्यसमिति बैठकलाई सम्बोधन गर्दै राष्ट्रिय स्वतन्त्र पार्टीलाई बधाई दिएका छन् ।

मंगलबार सानेपामा बसिरहेको बैठकमा सम्बोधनका क्रममा उनले यस्तो बताएका हुन् ।

‘पाँच वर्षका लागि सरकारको ड्राइभिङ सिट प्राप्त गरेकोमा रास्वपालाई बधाई छ । अबको पाँच वर्ष सफलतापूर्वक सरकार चलाओस्’, उनले भने, ‘कांग्रेसलाई फरक र परिपक्व जिम्मेवारी मिलेको छ । अब कांग्रेसले प्रमुख प्रतिपक्षीका रुपमा सरकारलाई जिम्मेवार बनाउने भूमिका खेल्छ । हामी रास्वपा नेतृत्वको सरकारलाई सफल बनाउन रचनात्मक प्रतिपक्षको भूमिका खेल्छौँ।’

थापाले अब यसबीचमा गिरीबन्धु प्रकरण, वाइडबडी प्रकरण र नेताका घरमा भेटिएका भनिएका पैसाबारे छानबिन हुनुपर्ने बताए ।

थापाले भनेका गिरीबन्धुमा नेकपा एमालेका अध्यक्ष केपी शर्मा ओलीको नाम जोडिएको थियो । उता भदौ २३ र २४ गतेको जेन-जी आन्दोलनका क्रममा कांग्रेसका तत्कालीन सभापति शेरबहादुर देउवा निवासमा भेटिएको भनिएको पैसाबारे पनि छानबिन हुनुपर्ने उनले बताए ।

त्यस्तै भदौ २३ गते भएको युवाहरूको हताहती र भदौ २४ गतेको विध्वंशको पनि छानबिन र त्यसमा संलग्नलाई कारबाही गरिनुपर्ने उनले बताएका छन् ।

उनले सार्वजनिक ओहदामा यसअघि बसेका सबैको सम्पत्ति छानबिन गरेर जिम्मेवार बनाउनुपर्ने बताए । यसमा कांग्रेसले रास्वपा सरकारलाई पूरा साथ दिने उनको भनाइ छ।