काठमाडौं- विशेष अदालतले भ्रष्टाचार (गैरकानुनी सम्पत्ति आर्जन) मुद्दामा प्रतिवादी सुनिल पौडेलको नाममा सिंगापुरस्थित बैंक खाताको विवरण यथाशीघ्र झिकाउन आदेश दिएको छ।

नेपाल सरकार वादी रहेको उक्त मुद्दामा विशेषका अध्यक्ष सुदर्शनदेव भट्ट तथा सदस्यहररू हेमन्त रावल र डिल्लीरत्न श्रेष्ठको इजलासले सोमबार यस्तो आदेश जारी गरेको हो।

अदालतले यसअघि ०८१ पुस ९ गते दिएको आदेशअनुसार सिंगापुरस्थित युनाइटेड ओभरसिज बैंकमा रहेको भनिएको बचत तथा मुद्दती खाताको विवरण प्राप्त नभएको उल्लेख गर्दै अख्तियार दुरुपयोग अनुसन्धान आयोगमार्फत् विशेष सरकारी वकिल कार्यालय काठमाडौंलाई आवश्यक विवरण झिकाउन निर्देशन दिएको छ।

यस्तै, पारस्परिक कानुनी सहायता ऐन, २०७० अनुसार केन्द्रीय अधिकारी तोकिएको कानून, न्याय तथा संसदीय मामिला मन्त्रालयमार्फत सिंगापुरसँग पारस्परिक कानुनी सहायता सम्झौता नभएको अवस्थामा उक्त विवरण प्राप्त हुन सक्ने नसक्नेबारे स्पष्ट जवाफ माग्न आदेश दिइएको छ।

अदालतले नेपाल राष्ट्र बैंकलाई पनि बैंकिङ प्रक्रियामार्फत् सिंगापुरको केन्द्रीय बैंकसँग समन्वय गरी सम्बन्धित खाताको विवरण यथाशीघ्र झिकाई पेश गर्न निर्देशन दिएको छ।