दोलखा– हिमाली जिल्ला दोलखामा हिउँदे वर्षा सँगै हिमपात हुन सुरू भएको छ । 

जिल्लामा मंगलबार दिउँसो देखि कालिञ्चाेक ,शैलुङ लगायतका माथिल्लो क्षेत्रमा हिउँ परिरहेको छ भने, तल्लो क्षेत्रमा असिना सहित हिउँदे वर्षा भएको हो । 

समग्र जिल्लामा ५ महिनापछि हिमपात र वर्षाद हुँदा हिउँदे किसानलाई राहत मिलेको छ ।

फागुन १२ गते आज दिउँसोदेखि सुरु भएको हिमपात र वर्षाद केही दिन लम्बिन सक्ने अनुमान गरिएको छ । पछिल्लो दुई घण्टा देखि वर्षासँगै हिमपात भइरहेकाले जिल्लाभर चिसो बढेको छ । 

हिउँदे सिजनपरेको वर्षाले जिल्लाका आलु र गहुँ किसानलाई राहत मिलेको छ ।

लामो समयसम्म हिउँदे  वर्षा र हिमपातको पर्खाइमा रहेका किसान तथा होटल तथा पर्यटन व्यवसायीलाई फागुन दोस्रो साताको मुखमा परेको हिउँदे वर्षा र हिमपातले उत्साहित बनाएको छ । 

मंगलबार दिउँसो देखिनै जिल्लाको धार्मिक तथा पर्यटकीय स्थल शैलुङ र कालिञ्चाेकमा बाक्लो हिमपात भएकाले दोलखामा बुधबारदेखि पर्यटक बढ्ने संकेत देखिएको छ ।

दोलखाको प्रसिद्ध धार्मिक एवम् पर्यटकीयस्थल कालिञ्चाेक र शैलुङमा हिमपात भइरहेको स्थानीय तेम्बा पाख्रीनले जानकारी दिए । कालिन्चोक क्षेत्रमा एक फिटसम्म हिउँ झरेको छ ।

हिउँले शैलुङ, कालिञ्चाेकका डाँडाकाडा सेताम्मे बनेका छन् ।सुवाश बस्नेत /दोलखा