काठमाडौं– नेकपा एमालेले निर्वाचन नजिकिँदै जाँदा विभिन्न स्थानमा निषेधाज्ञा र कर्फ्यु लगाएर त्रास सिर्जना गर्न खोजेको जनाएको छ ।  

मंगलबार पार्टी कार्यालय च्यासलमा पत्रकार सम्मेलन गर्दै एमालेले तराई–मधेशका केहि स्थानमा निषेधाज्ञा र कर्फ्यु जारी हुँदा मतदातामा भयरहित वातावरणमा मतदान केन्द्रमा पुगेर मतदान गर्न पाउने संवैधानिक अधिकार कुण्ठित हुनसक्ने भन्दै चिन्ता समेत व्यक्त गरेको छ । 

शान्ति सुरक्षाका नाममा निषेधाज्ञा र कर्फ्यु लगाउने कामले क्षणिक सुरक्षाको अनुभूति भएपनि मतदाताको मनमा डर, त्रासको सिर्जना गर्ने एमालेको ठहर छ । भयरहित निर्वाचनका लागि सरकारलाई पुनः शान्ति सुरक्षाको प्रत्याभूति गराउन आग्रह गरिएको एमाले आम निर्वाचन प्रेस संयोजक मीन बहादुर शाहीले बताए ।

त्यस्तै अहिले निर्वाचन सार्ने हल्ला चलेको प्रति ध्यानाकर्षण भएको भन्दै कुनै पनि बहानामा निर्वाचन नसारी घोषित मितिमा नै निर्वाचन हुनुपर्नेमा एमालेको दृढ अडान रहेको शाहीले उल्लेख गरे । 

एमालेले मत सर्वेक्षणका नाममा जनमत प्रभावित पारिएको भन्दै आपत्ति जनाएको छ । सार्वजनिक खपतका लागि सार्वजनिक गरिने एकपक्षीय तथ्याङ्कबाट मतदाताको मनोविज्ञान प्रभावित गर्नसक्ने भएकाले यस्ता क्रियाकलाप रोक्न निर्वाचन आयोगको ध्यानाकर्षण गराइएको शाहीले बताए । 

पछिल्लो समय गलत सूचना, अनर्गल दुष्प्रचार र कृत्रिम सामाग्रीहरू प्रसारले सामाजिक सद्भाव भड्काउने, राजनीतिक ध्रुवीकरणको भाष्य खडा गर्ने गम्भीर चुनौती सिर्जना गरेको एमालेको ठहर छ ।