नुवाकोट- नेपाली कांग्रेसका प्रतिनिधिसभा सदस्य उम्मेदवार डा. प्रकाश शरण महतले नुवाकोट क्षेत्र नम्बर १ का लागि आफ्नो ‘मेरो प्रतिज्ञा’ प्रतिज्ञापत्र सार्वजनिक गरेका छन् ।

प्रतिनिधिसभा निर्वाचनका लागि जारी गरिएको यो प्रतिज्ञापत्रमा डा. महतले ‘आधुनिक, रोजगारीयुक्त, शिक्षित र विकसित, समृद्ध नुवाकोट’ निर्माण गर्ने मुख्य लक्ष्य राखेका छन् ।

उहाँले ‘नारा होइन, नतिजा, वाचा होइन, विकास’ भन्ने नाराका साथ आफ्ना एजेन्डा मतदातासमक्ष प्रस्तुत गरेका हुन् ।

मुख्य प्रतिबद्धता :

• पूर्वाधार विकास : दोबाटो छहरे-सुरुङ मार्ग, बालाजु-रानीपौवा-पिपलटार, तितिपिङ्ले-चाँदेभ-कुमारी-गाछी वैकल्पिक राजमार्ग, लिवु-तादी नदी कटान नियन्त्रण, ६ फिटदेखि विभिन्न सडक खण्ड पूरा गर्ने, काठमाडौंसँग जोड्ने सबै मुख्य सडक स्तरोन्नति ।
• कृषि आधुनिकीकरण : आधुनिक सिँचाइ, मल-बीउ-बजारको पहुँच, स्थानीय उत्पादन (स्याउ, आलु, प्याज, स्याउ, ट्राउट माछा, मह आदि) को ब्रान्डिङ र शीतभण्डार निर्माण । किसानलाई बजार मूल्यको सुनिश्चितता ।
• पर्यटन विकास : ककनी, सूर्यचौर, बाघमारा, तलाबु, पन्चकन्या, गोसाइकुण्ड क्षेत्रलाई अन्तर्राष्ट्रियस्तरको धार्मिक-साहसिक पर्यटन गन्तव्य बनाउने, पदमार्ग र केबलकार निर्माण ।
• शिक्षा र स्वास्थ्य : बागमती प्रदेशस्तरीय प्राविधिक तथा सूचना प्रविधि कलेज स्थापना, गुणस्तरीय विद्यालय र डिजिटल शिक्षा, क्षेत्र नं. १ मा विशेषज्ञसहितको अस्पताल सञ्चालन ।
• युवा र महिला : युवा उद्यमशीलता, कृषि-पर्यटन-उद्योगमा सीप विकास, महिला सशक्तीकरण र स्वरोजगारका नयाँ अवसर ।
• उद्योग र लगानी : काठमाडौं नजिकको नुवाकोटलाई औद्योगिक तथा व्यवसायिक केन्द्र बनाउने ।

डा. महतले प्रतिज्ञापत्रमा भनेका छन्, ‘म परिणामका लागि काम गर्छु । कुरामा होइन काममा विश्वास गर्छु । विकास, सुशासन, जनताको आर्थिक-सामाजिक समृद्धि र भ्रष्टाचारको अन्त्यका लागि सधैँ प्रतिबद्ध छु ।’

उनले यो क्षेत्रबाट पहिलो पटक प्रत्यक्ष उम्मेदवार बनेका छन् । अघिल्ला निर्वाचन क्षेत्रको विकास अनुभवलाई नुवाकोटमा प्रयोग गर्ने उनले बताएका छन् ।