काठमाडौं– राष्ट्रिय स्वतन्त्र पार्टी (रास्वपा)बाट काठमाडौं क्षेत्र नम्बर- १ की उम्मेदवार रञ्जु दर्शना आमा बनेकी छन्। उनले आज छोरालाई जन्म दिएकी हुन्।

प्रसूतिका लागि उनी काठमाडौंस्थित निजामती अस्पताल भर्ना भएकी थिइन्। मंगलबार बिहान करिब ११ बजे उनले सामाजिक सञ्जाल फेसबुकमार्फत भिडियो सन्देश सार्वजनिक गर्दै आफू अस्पताल भर्ना भएको जानकारी दिएकी थिइन्।

तत्कालीन विवेकशील साझा पार्टीबाट उम्मेदवारी मनोनयन अघिमात्रै प्रवेश गरेकी उनलाई रास्वपाले समानुपातिक उम्मेदवार बनाएको थियो । तर, त्यसको विरोध भएपछि उनले समानुपातिक सूचीबाट चुनाव नलड्ने घोषणा गर्दै प्रत्यक्ष उम्मेदवार बनिन् ।

उनी अस्पतालमा भए पनि चुनाव प्रचारप्रसार मतदातासँग भोट माग्ने काम रोकिएको छैन। काठमाडौं १ का रास्वपा कार्यकर्ता पुरुषोत्तम भट्टराईले चुनावी अभियान जारी रहेको बताए ।