काठमाडौं – नेपाली कांग्रेसले भावी प्रधानमन्त्रीका रूपमा अघि सारेका सभापति गगन थापाले आफू चटक र जादुमा विश्वास नगर्ने स्पष्ट पारेका छन्।

शनिबार नयाँ बानेश्वरमा आयोजित सर्लाही–४ का युवासँगको अन्तरक्रियामा बोल्दै थापाले छडी घुमाउँदैमा समस्या समाधान नहुने बताएका हुन्।

 ‘म चटक गर्न जान्दिन। जादुजस्तो छडी घुमाउँदैमा समस्या समाधान हुँदैन,’ उनले भने, ‘सडक लामो समय बन्द नहोस्, समयमै बनोस् भन्नु भनेको ठेक्का प्रकृया कस्तो बनाउने, कन्ट्रयाक्ट कसरी गर्ने र लो बिडिङ नै समाधान हो कि होइन भन्नेबाट सुरु हुन्छ।’

थापाले आफू प्रधानमन्त्री वा पार्टी सभापतिका रूपमा होइन, सर्लाही–४ का जनप्रतिनिधि बनेर जान लागेको बताए। उनले सर्लाहीका जनताको भरमा उम्मेदवार बनेको भन्दै युवाहरूलाई घरघरमा गएर अभिभावकलाई सम्झाई मत माग्न आग्रह गरे। 

‘मैले गुनासो गर्ने मौका दिनेछैन,’ उनले भने।

काठमाडौं–४ मा आफूले जनताको विश्वासका कारण पराजय नझेलेको उल्लेख गर्दै थापाले सर्लाही–४ मा पनि त्यही विश्वास पाए सकारात्मक वातावरण बन्ने दाबी गरे।

सामान्य परिवारबाट आएको र विभिन्न दुःखकष्ट भोगेकाले जनताको पीडा बुझ्ने क्षमता आफूमा रहेको भन्दै उनले ढुक्कसँग साथ दिन मतदातालाई अपिल गरे।