वासिङ्टन– अमेरिकी राष्ट्रपति डोनाल्ड ट्रम्पले क्यानाडाबाट आयात हुने केही वस्तुमा लगाइएको ५० प्रतिशत अतिरिक्त भन्सार महसुलको दायरा परिवर्तन गरेका छन् ।

शुक्रबार हस्ताक्षर गरिएको घोषणापत्रअनुसार केही वस्तुलाई अतिरिक्त भन्सार महसुलको सूचीबाट हटाइएको छ भने केही नयाँ वस्तु थपिएका छन् । संशोधित व्यवस्था अक्टोबर ३० देखि लागू हुनेछ ।

ह्वाइट हाउसको वेबसाइटमा प्रकाशित घोषणापत्रअनुसार क्यानाडाबाट अमेरिकामा आयात गरिने प्लाइवुडका पाता, केही कागजजन्य उत्पादन, निश्चित प्रकारका मेसिनरी तथा रेफ्रिजरेसन उपकरण र प्याकिङमा प्रयोग हुने केही क्रेट तथा बाकसमा अब ५० प्रतिशत अतिरिक्त भन्सार महसुल लाग्ने छैन ।

यसको विपरीत, क्यानाडाबाट आयात गरिने केही प्रकारका भल्भ, गलैँचा, फोहोरजन्य उत्पादन तथा अन्य निश्चित सामग्रीमा भने उक्त दरको अतिरिक्त भन्सार महसुल लगाइनेछ ।

घोषणापत्रअनुसार अक्टोबर ३० वा त्यसपछि अमेरिकामा उपभोगका लागि आयात गरिने वा भण्डारणबाट उपभोगका लागि निकालिने वस्तुमा संशोधित व्यवस्था लागू हुनेछ ।

अमेरिकी वाणिज्य क्षेत्रमा परेको भार वा बेफाइदालाई सन्तुलनमा ल्याउन महसुलको दायरा परिवर्तन गरिएको घोषणापत्रमा उल्लेख छ । यो कदम अमेरिकी हित र सार्वजनिक हितअनुकूल रहेको दाबी पनि गरिएको छ ।

ट्रम्प प्रशासनले क्यानाडाले अमेरिकी मोटरगाडी तथा तिनका पार्टपुर्जाको निर्यातमा भेदभावपूर्ण र अनुचित व्यवहार गरेको आरोप लगाउँदै त्यसको प्रतिक्रियास्वरूप अतिरिक्त भन्सार महसुल लगाइएको बताउँदै आएको छ ।

यसअघि ट्रम्पले अगस्ट २२ मा क्यानाडाबाट आयात हुने करिब २० अर्ब अमेरिकी डलर मूल्यका वस्तुमा ५० प्रतिशत अतिरिक्त भन्सार महसुल लगाएका थिए । त्यसको जवाफमा क्यानाडाले पनि सोही बराबर मूल्यका अमेरिकी वस्तुमा भन्सार महसुल लगाएको थियो । क्यानाडाको प्रतिकारात्मक कदम सेप्टेम्बर ८ देखि लागू भएको थियो ।

दुवै देशबीच जारी भन्सार विवादले उत्तर अमेरिकाका दुई प्रमुख व्यापारिक साझेदारबीचको आर्थिक सम्बन्धमा थप तनाव उत्पन्न गरेको छ ।