काठमाडौँ – सत्तारूढ नेकपा (एमाले) को केन्द्रीय सचिवालय बैठक ललितपुरको च्यासलस्थित पार्टी मुख्यालयमा सुरु भएको छ। बिहीबार बिहान १० बजेका लागि आह्वान गरिएको बैठक केही ढिला गरी सुरु भएको हो।

जारी बैठकले पार्टीको स्थायी कमिटी र पोलिट्ब्यूरो सदस्यहरूको नामावली टुंगो लगाउनुका साथै विभिन्न विभागहरूलाई पूर्णता दिने कार्यसूची रहेको छ। यसका साथै भौगोलिक तथा गैरभौगोलिक कमिटीमा सह-इन्चार्ज तोक्ने विषयमा पनि छलफल भइरहेको छ।

एमाले प्रचार विभाग प्रमुख नीरज आचार्यका अनुसार सचिवालय बैठकबाट नेताहरूको नयाँ कार्यविभाजन सम्बन्धी प्रस्ताव पारित गरी अनुमोदनका लागि आजै बस्ने केन्द्रीय कमिटी बैठकमा पेस गरिनेछ।

सचिवालय बैठक सकिएलगत्तै केही दिनदेखि जारी एमालेको केन्द्रीय कमिटी बैठक पनि आजै पुनः बस्ने कार्यक्रम रहेको छ।