काठमाडाैँ – जापानको निसिनस्थित कोरोगी स्पोर्ट्स पार्कमा बिहीबारदेखि सुरु भएको २०औँ एशियन गेम्स अन्तर्गत पुरुष क्रिकेटको उद्घाटन खेलमा अफगानिस्तानले विजयी सुरुआत गरेको छ। समूह ‘ए’ को पहिलो खेलमा अफगानिस्तानले घरेलु टोली जापानलाई ४८ रनले पराजित गर्दै शानदार जित हात पारेको हो।

टस जितेर पहिले फिल्डिङ गर्ने जापानको निर्णयपछि ब्याटिङमा उत्रिएको अफगानिस्तानले निर्धारित २० ओभरमा ६ विकेट गुमाएर १२९ रनको चुनौतीपूर्ण योगफल तयार पारेको थियो। अफगानिस्तानका लागि वसिन अकरमले २९ बलमा ३४ रन र कप्तान दरविस रसुलीले २७ बलमा २९ रनको योगदान दिए। यस्तै, मोहम्मद इसहाकले २५ र करीम जनतले २१ रन जोडे। जापानका बलर शोमा स्लेटर र इब्राहिम ताकाहाशीले समान २-२ विकेट लिए।

१३० रनको विजयी लक्ष्य पछ्याएको घरेलु टोली जापान अफगानिस्तानको कसिलो बलिङसामु १९.३ ओभरमा ८१ रन बनाउँदा अलआउट भयो। जापानका लागि रेओ साकुरालो-थॉमसले सर्वाधिक २३ रन र बेन्जामिन इटो-डेभिसले १७ रन बनाउनुबाहेक अन्य ब्याटरले दोहोरो अङ्कमा रन जोड्न सकेनन्।

जापानलाई सस्तैमा समेट्न अफगानिस्तानका स्पिनर अरब गुलले उत्कृष्ट बलिङ गर्दै ४ ओभरमा ८ रन मात्र दिएर ४ विकेट लिए। उनलाई साथ दिँदै नगेयालिया खरोटेले १९ रन खर्चेर ३ विकेट र अब्दुल्लाह अहमदजाईले २ विकेट लिएका थिए।

समूह ‘ए’मा जापान अफगानिस्तानसँगै नेपाल रहेका छन् । नेपालले शुक्रबार नेपालले अफगानिस्तानको सामना गर्दै एसियन गेम्सको सुरुवात गर्नेछ । नेपाल र अफगानिस्तानको खेल शुक्रबार बिहान १० : ४५ बजे सुरु हुनेछ ।