काठमाडौं– सभामुख डोलप्रसाद अर्यालले नेकपा एमाले संसदीय दलका नेता रामबहादुर थापा ‘बादल’ र राष्ट्रिय स्वतन्त्र पार्टी (रास्वपा) की सांसद इन्दिरा रानामगरले प्रतिनिधिसभामा प्रयोग गरेका केही शब्द अभिलेखबाट हटाउन निर्देशन दिएका छन्।

सभामुख अर्यालले सोमबार सदनमा प्रयोग भएका असंसदीय तथा अमर्यादित शब्द हटाउन संसद् सचिवालयलाई निर्देशन दिएका हुन्।

गत भदौ १ गतेको प्रतिनिधिसभा बैठकमा सांसद रानामगरले प्रयोग गरेका ‘भालु’, ‘वेश्या’ र ‘साइबर सेना’ लगायतका शब्द संसद्को रेकर्डबाट हटाउन निर्देशन दिइएको हो ।

त्यस्तै, भदौ ३ गतेको बैठकमा एमाले संसदीय दलका नेता बादलले प्रयोग गरेका ‘नागरिकहरूको बलि’, ‘पाकिस्तानी मोडल’, ‘नर्थ कोरिया मोडल’ र ‘अमेरिका’ शब्दसमेत अभिलेखबाट हटाउन सभामुखले निर्देशन दिएका छन्।

सभामुखको निर्देशनपछि संसद् सचिवालयले सम्बन्धित बैठकका अभिलेखबाट ती शब्द हटाउने प्रक्रिया अघि बढाउनेछ।