काठमाडौं– नेकपा (एमाले) का सांसद ऐन बहादुर महरले कैलालीको अत्तरियामा सवारीले किचेर महिलाको हत्या गरिएको घटनामा संलग्न दोषीमाथि हदैसम्मको कारबाही गर्न सरकारसँग माग गरेका छन् ।

शुक्रबार बसेको प्रतिनिधिसभाको बैठकमा आकस्मिक समयमा बोल्दै सांसद महरले कैलालीको गोदावरी नगरपालिका–२ अत्तरिया नजिकै महाकाली यातायातको बसले बझाङको मष्टा गाउँपालिका–६ की सिन्की बोहरामाथी नियतवश दुर्घटना गराएको आरोप लगाए ।

सानो व्यवसाय गरेर बालबच्चा पालनपोषण गर्दै आएकी बोहरालाई सडकमा लडेपछि पुनः गाडी पछाडि फर्काएर किचेर घटनास्थलमै ज्यान लिएको उनले बताए ।

सांसद महरले घटनापछि विरोधमा उत्रिएका मृतकका आफन्त र स्थानीयमाथि प्रहरीले दमन गरेको भन्दै आपत्ति जनाए । 

प्रहरीले जबरजस्ती शव उठाएर लैजाने क्रममा मृतकका श्रीमान्माथि लाठी प्रहार गरी घाइते बनाएको उल्लेख गर्दै उनी अस्पतालमा उपचाररत रहेको सदनलाई जानकारी दिए ।

अहिलेसम्म शव नबुझिएको र पीडित परिवार आन्दोलनमा रहेको भन्दै सांसद महरले बालबच्चाको बिचल्ली भएको प्रति सरकारको गम्भीर ध्यानाकर्षण गराए । 

उनले घटनाको सत्यतथ्य छानबिन गरी चालक र संलग्न दोषीमाथि कडा कारबाही गर्न तथा पीडित परिवारलाई उचित न्याय र क्षतिपूर्ति उपलब्ध गराउन माग गरे ।