जनकपुरधाम– धनुषाको मिथिला नगरपालिका–६ स्थित बसहीखोला नजिकै आज प्रहरीले हवाई फायर गरी दुईजना भारतीय नागरिकलाई पक्राउ गरेको छ । 

भारतबाट नेपाल आएर लागूऔषध कारोबार गरिरहेको सूचनाका आधारमा लागूऔषध नियन्त्रण ब्यूरो बर्दिबास र इलाका प्रहरी कार्यालय ढल्केबरबाट खटिएको टोलीले एक राउन्ड हवाई फायर गरेर भारतको हर्लाखी थाना वडा नं ५ का २६ वर्षीय सन्तोषकुमार महतो र भारतको बासोपट्टी थाना वडा नं २ का ४५ वर्षीय मिथिलेशकुमार साहुलाई पक्राउ गरेको हो । 

जिल्ला प्रहरी कार्यालयका प्रवक्ता एवं प्रहरी नायब उपरीक्षक मधुसुदन न्यौपानेका अनुसार प्रहरी टोलीलाई देखेपछि भाग्न खोज्दा प्रहरीले हवाई फायर गरेर दुवै जनालाई नियन्त्रण लिएको हो ।

पक्राउ परेका महतोको पाइन्टको गोजीबाट लागूऔषध खैरो हिरोइनजस्तो देखिने गिलो पदार्थ १०३.२२० ग्राम बरामद भएको प्रहरी नायब उपरीक्षक न्यौपानेले बताए । दुवै जनामाथि थप अनुसन्धान भइरहेको उनले बताए ।