काठमाडौं– जिल्ला प्रहरी परिसर, काठमाडौंले आर्थिक बर्ष २०८२/८३ मा काठमाडौंमा अपराधका घटनामा ११ हजार भन्दा बढि मुद्दा दर्ता भएको जनाएको छ ।  

काठमाडौं प्रहरीले शुक्रबार पत्रकार सम्मेलन गर्दै आर्थिक बर्ष २०८२/८३ मा ११ हजार ८७ वटा अपराधको मुद्दा दर्ता भएको र ८ हजार ५ सय ७११ जनालाई पक्राउ गरिएको जनाएको हो । आर्थिक बर्ष २०८१/८२ मा १२ हजार ९ सय १५ अपराधका घटना दर्ता भएको थियो ।

धेरै संख्यामा दर्ता भएका उजुरीहरुमा बैकिंङ कसुर पहिलो नम्वरमा रहेको छ भने त्यसपछि क्रमश अभद्र व्यवहार, चोरी, ठगि, लागूऔषध, आत्महत्या, जवरजस्ती करणी, ज्यानमार्ने उद्योग लगाएत रहेको जिल्ला प्रहरी परिसर काठमाडौँका प्रवक्ता एसपी पवन भट्टराईले जानकारी दिए ।

उनले सुरक्षा व्यवस्थामा प्रविधिको प्रयोग गर्दै एआइ क्यामरामार्फत ५९ जना संकित मानिस पहिचान गरि पक्राउ गरिएको बताए । 

सोहि अवधिमा १ सय ४५ हातहतियार बरामद भएको र ५२ जनालाई पक्राउ गरिएको, १ सय ७५ फरार कैदी र ९४ जना थुनुवाई पक्राउ गरिएको काठमाडौ परिसरले जनाएको छ । 

आर्थिक बर्ष २०८२/८३ मा १६ सय धर्ना, ४४३ विरोध-जुलुस भएको र ३ सय ५१ प्रदर्शनकारीलाई पक्राउ गरिएको प्रवक्ता भट्टराईले जानकारी दिए । 

सार्वजनिक सेवा प्रवाह हुने स्थानमा दुख–हैरानी दिने ३०९ जनालाई पक्राउ गरिएको र ६१ जनामाथि कानुनी कारबाही अघि बढाइएको उनले बताए । 

त्यस्तै काठमाडौं प्रहरी परिसरले साइबर अपराध तथा नयाँ–नयाँ एप्लिकेसनहरूको संख्या तीव्र रूपमा बढेकाले पहिचान, निगरानी र नियन्त्रणमा कठिनाइ भइरहेको जनाएको छ । 

सचेत नागरिकहरूसमेत ठगीको शिकार हुनुपरेको र सामाजिक सञ्जालमा हुने कुप्रचार-साइबर बुलिङले मानिसहरूको पारिवारिक तथा सामाजिक जीवनमा असर पारेको प्रवक्ता भट्टराईले बताए ।

उनले अपराधका घटना नियन्त्रण र न्यूनिकरण गर्न दैनिक १,१५० देखि १,१८० जना प्रहरी जनशक्ति क्षेत्र (फिल्ड) तथा चेकप्वाइन्टहरूमा खटाइने गरिएको र दैनिक २२० भन्दा बढी सवारी साधन चेकजाँच हुने गरेको जानकारी दिए ।