पेरिस– फ्रान्सले १५ वर्षमुनिका बालबालिकाको सामाजिक सञ्जाल प्रयोगमा प्रतिबन्ध लगाउने निर्णय गरेको राष्ट्रपति इमानुएल म्याक्रोनले बताएका छन्।

राष्ट्रपति म्याक्रोनले सामाजिक  सञ्जाल एक्समार्फत सांसदहरूलाई यस विषयमा समर्थन जनाएकोमा धन्यवाद दिँदै निर्णय कार्यान्वयनप्रति आफ्नो प्रतिबद्धता व्यक्त गरेका छन्। 

उनले संवैधानिक परिषद्को निर्णयपछि नयाँ व्यवस्था लागू गरिने र १५ वर्षमुनिका बालबालिकालाई अनलाइन जोखिमबाट जोगाउन आवश्यक कदम चालिने बताएका छन्।

सिएनएनका अनुसार, यो निर्णय कार्यान्वयन भएमा फ्रान्स सामाजिक सञ्जाल प्रयोगका लागि उमेर सीमा लागू गर्ने युरोपेली संघ ९ईयू० को पहिलो देश बन्नेछ।

बालबालिकाको मानसिक स्वास्थ्य, अनलाइन सुरक्षा र डिजिटल जोखिम न्यूनीकरण गर्ने उद्देश्यले विभिन्न देशहरूले पछिल्लो समय सामाजिक सञ्जाल प्रयोगमा कडाइ गर्न थालेका छन्।

यसअघि बेलायतले १६ वर्षमुनिका बालबालिकाका लागि सामाजिक सञ्जाल प्रयोगमा प्रतिबन्ध लगाउने घोषणा गरेको थियो। तत्कालीन प्रधानमन्त्री कीर स्टारमरले यसलाई समयको आवश्यकता भएको भन्दै सामाजिक सञ्जालका कारण बालबालिकाको खेलकुद, निद्रा र परिवारसँग बिताउने समय प्रभावित भइरहेको तथा यसले मानसिक स्वास्थ्यमा असर पार्न सक्ने बताएका थिए।

त्यस्तै, जापानले पनि कम उमेरका प्रयोगकर्ताको सुरक्षाका लागि कडा उमेर प्रमाणीकरण प्रणाली लागू गर्न र सामाजिक सञ्जाल सञ्चालन गर्ने कम्पनीहरूको जिम्मेवारी बढाउन प्रस्ताव गरेको छ।

अष्ट्रेलियाले यसअघि नै १६ वर्षमुनिका बालबालिकाका लागि सामाजिक सञ्जालमा प्रतिबन्ध लागू गरिसकेको छ। यस्तै, स्पेन र डेनमार्कलगायतका देशहरूले पनि बालबालिकाको अनलाइन सुरक्षाका लागि यस्तै उपाय अपनाउने विषयमा विचार गरिरहेका छन्।

विश्वभर बालबालिकाको डिजिटल सुरक्षाबारे बहस बढिरहेका बेला फ्रान्सको यो कदमले सामाजिक सञ्जाल प्रयोगमा उमेर सीमा निर्धारण गर्ने नीतिलाई थप बल पुग्ने अपेक्षा गरिएको छ।