एजेन्सी– इरानले संयुक्त राष्ट्रसङ्घीय आणविक निगरानी निकाय अन्तर्राष्ट्रिय आणविक ऊर्जा एजेन्सी (आईएईए) का निरीक्षकहरूले अमेरिकी आक्रमण भएका आणविक स्थलहरूको भ्रमण गर्ने कुनै योजना नरहेको स्पष्ट पारेको छ।

तेहरानमा आयोजित पत्रकार सम्मेलनमा विदेश मन्त्रालयका प्रवक्ता इस्माइल बाघाईले यस्तो कुनै सहमति वा तयारी नभएको बताए। उनको भनाइले अमेरिकी उपराष्ट्रपति जेडी भान्सले गरेको दाबीलाई प्रत्यक्ष चुनौती दिएको छ, जसमा स्विट्जरल्यान्डमा भएको वार्तापछि आईएईएलाई इरानी साइटहरूमा पहुँच दिने सहमति भएको संकेत गरिएको थियो।

इरानले सन् २०२५ मा इजरायलसँग भएको १२ दिने युद्धपछि पनि देशभित्र र बाहिर आईएईएको अनुगमन जारी रहेको जनाएको छ। तर अमेरिकी आक्रमणमा परेका संवर्धन केन्द्रहरूमा भने कुनै पहुँच नदिइएको स्पष्ट गरेको छ।

प्रवक्ता बाघाईले अन्य विषयमा टिप्पणी गर्दै इरानको आयात नीति मूल्य र गुणस्तरका आधारमा निर्धारण हुने बताए। उनले पछिल्ला राजनीतिक टिप्पणीबारे प्रत्यक्ष प्रतिक्रिया नदिए पनि वर्तमान परिस्थितिले विभिन्न व्याख्या जन्माएको उल्लेख गरे।