काठमाडौं- नेकपा एमालेका उपाध्यक्ष विष्णुप्रसाद पौडेललाई सम्पत्ति शुद्धीकरण विभागको कार्यालयमा उपस्थित गराइएको छ।

सोमबार सुर्खेतको वीरेन्द्रनगरस्थित शुभ होटल परिसरबाट पक्राउ गरिएका उनलाई मंगलबार बिहान नेपालगञ्ज हुँदै काठमाडौं ल्याएर विभागमा हाजिर गराइएको हो ।

उनलाई सोमबार विभागले सम्पत्ति शुद्धीकरणसम्बन्धी मुद्दामा अनुसन्धानका लागि पक्राउ गर्न जिल्ला प्रहरी कार्यालय सुर्खेतलाई इमेल लेखेको थियो ।

सुर्खेतको शुभ होटलमा एमालेको चुनावी समीक्षा तथा पुनर्गठन कार्यक्रम चलिरहेकै बेला प्रहरीले पौडेललाई पक्राउ गरेको थियो ।

त्यसपछि उनलाई नेपालगञ्जस्थित प्रहरी गणमा राखेर मंगलबार बिहानै हवाईजहाजमार्फत् काठमामडौं ल्याइएको हो । उनीमाथि अब सम्पत्ति शुद्धीकरणसम्बन्धी अभियोगमा अनुसन्धान अघि बढाइँदैछ । उनीमाथि हाल जेलमा रहेका व्यवसायी दीपक भट्टसँग उठबस र कारोबारको आरोप सरकारले लगाएको छ।