काठमाडौं– प्रधानमन्त्री कप एनभिए महिला तथा पुरुष भलिबल लिगमा पुरुषतर्फ हेल्प नेपाल स्पोट्र्स क्लबले विजयी सुरुवात गरेको छ ।  

त्रिपुरेश्वरस्थित राष्ट्रिय खेलकुद परिषद् (राखेप) को कभर्डहलमा बिहीबार भएको खेलमा हेल्प नेपालले बुढानीलकण्ठ भलिबल क्लबलाई ३–० को सोझो सेटमा पराजित गरेको हो । खेलमा हेल्प नेपाल २५–१३, २५–१७ र २५–१८ ले विजयी भएको हो ।

त्यस्तै प्रतियोगिता अन्तर्गत महिलातर्फ विभागीय टोली एपीएफ क्लब र साबिक विजेता नेपाल पुलिस क्लबले विजयी सुरुवात गरेका छन् । 

एपिएफले अर्को विभागीय टोली त्रिभुवन आर्मी क्लबलाई ३–१ को सेटमा पराजित गर्‍यो । खेलमा एपिएफ २५–२३,१७–२५,२५–१९,२५–१९ ले विजयी भएको थियो ।

त्यस्तै पुलिस क्लबले एभरेस्ट भलिबल क्लबमाथि ३–० को सहज जित निकाल्यो । पुलिसले २६–२४, २५–१६ र २५–१८ ले जित हासिल गरेको हो । 

नेपाल भलिबल संघको आयोजनामा भएको बिहीबारबाट सुरु प्रतियोगितामा क्लब च्याम्पियनसिपबाट छनोट भएका महिलातर्फका ६ र पुरुषतर्फका ८ टोलीले लिगमा प्रतिस्पर्धा गरिरहेका छन् । महिला र पुरुष दुवैतर्फको विजेताले १० लाख, दोस्रोले ५ लाख र तेस्रो टोलीले २ लाख ५० हजार रुपैयाँ प्राप्त गर्ने संघले जनाएको छ ।