इस्लामावाद – पाकिस्तानको दक्षिणपश्चिम बलुचिस्तान प्रान्तमा रहेको एक अन्वेषण तथा अनुसन्धान स्थलमा भएको आक्रमणमा नौ जनाको मृत्यु भएको छ भने एक विदेशी कामदार अपहरणमा परेका छन्।

सुरक्षा स्रोतका अनुसार चागी जिल्लास्थित नेसनल रिसोर्सेज लिमिटेडद्वारा सञ्चालित तामा र सुनको अन्वेषण स्थलमा बुधबार स्थानीय समय अनुसार साँझ करिब ७ बजे आक्रमण भएको हो।

आक्रमणकारीहरूले साना हतियार तथा अन्डर–ब्यारेल ग्रेनेड लन्चर प्रयोग गर्दै तोडफोड गर्नुका साथै इन्धन भण्डारणमा क्षति पुर्‍याएका छन्। उनीहरूले तीनवटा शिविरमा आगजनीसमेत गरेका छन्।

जबाफी कारबाहीमा एक जना आक्रमणकारी मारिएको जनाइएको छ भने अन्य आक्रमणकारीहरू घटनास्थलबाट भागेका छन्। सुरक्षा बलले क्षेत्रमा खोजी तथा अनुसन्धान अभियान सुरु गरेको छ।

मृतकमध्ये तीन जना निजी सुरक्षा गार्ड र छ जना मजदुर रहेका छन्। हालसम्म कुनै पनि समूहले आक्रमणको जिम्मेवारी लिएको छैन।