काठमाडौँ – कालीमाटी बजारमा बिक्रीका लागि ल्याइएको रायोको सागमा अत्यधिक मात्रामा घातक विषादी भेटिएको छ। केन्द्रीय कृषि प्रयोगशालाले मंगलबार गरेको परीक्षणमा भक्तपुरमा उत्पादित रायोको सागमा ९९.६ प्रतिशत ‘अर्गानोफस्फेट’ नामक विषादी भेटिएको हो।

कालीमाटी फलफूल तथा तरकारी बजार विकास समितिका अनुसार बजारका १२ पसलबाट संकलन गरिएका १२ थरी तरकारी तथा फलफूलको नमुना परीक्षण गरिएको थियो। त्यस क्रममा भीमसेन अधिकारीको ३५९ नम्बर पसलमा बिक्रीका लागि राखिएको रायोको सागमा उक्त मात्रामा विषादी फेला परेको हो।

विषादीको मात्रा डरलाग्दो देखिएकाले उक्त साग उपभोगका लागि पूर्णतः अयोग्य ठहर गर्दै विसर्जन गर्न निर्देशन दिइएको प्रयोगशालाले जनाएको छ। हाल कालीमाटी बजारमा ‘कार्वामेट’ र ‘अर्गानोफस्फेट’ समूहका कीटनाशक विषादीको मात्र परीक्षण हुँदै आएको छ।

प्राविधिक मापदण्डअनुसार यस्तो प्रकारको विषादी ३५ प्रतिशतभन्दा कम देखिएमा मात्र उपभोग योग्य मानिन्छ। ३५ देखि ४५ प्रतिशतसम्म विषादी भएमा केही दिन राखेर मात्र खान मिल्ने र ४५ प्रतिशतभन्दा बढी देखिएमा मानव स्वास्थ्यका लागि खान अयोग्य मानिन्छ। रायोको सागमा भने झन्डै शतप्रतिशत (९९.६ प्रतिशत) विषादी भेटिएपछि उपभोक्ताको स्वास्थ्य सुरक्षामाथि गम्भीर प्रश्न उठेको छ।