काठमाडौं- नेकपा एमालेले प्रतिनिधिसभा निर्वाचनको समीक्षा प्रतिवेदन पठाउन तल्ला कमिटीलाई निर्देशन दिएको छ ।

केन्द्रीय निर्वाचन समीक्षाका लागि प्रतिवेदन पठाउन निर्देशन दिइएको पार्टी कार्यालयका सचिव भीष्म अधिकारीले बताए । ‘तल्ला कमिटीका सुझावका आधारमा हामीले केन्द्रीय बैठकमार्फत पनि समीक्षा गर्नेछौँ,’ उनले भने।

फागुन २१ गते सम्पन्न प्रतिनिधिसभा निर्वाचनमा एमालेले प्रत्यक्ष र समानुपातिक गरी २५ सिट प्राप्त गरेको छ । एमालेका ९ उमेदवार प्रत्यक्षतर्फ विजयी भएका थिए ।

समानुपातिकतर्फ एमालेले १६ सिट प्राप्त गर्यो । यस पटकको चुनावमा प्रत्यक्षतर्फ उमेदवारी दिएका एमालेको सिंगो पदाधिकारी नै पराजित हुन पुगे ।

यसबारे समीक्षाका लागि एमालेले तल्लो कमिटीबाट प्रतिवेदन माग गरेको हो । निर्वाचनको केन्द्रीय समीक्षाका लागि सचिवालय र केन्द्रीय कमिटी बैठक छिट्टै राख्ने अधिकारीले बताए ।