काठमाडौं- अमेरिकासँग कुनै वार्ता नभएको इरानले प्रष्ट्याएको छ । इरानको तस्निम समाचार संस्थाले अमेरिकासँग प्रत्यक्ष वा अप्रत्यक्ष कुनै किसिमको वार्ता नभएको प्रष्ट्याएको हो ।

यसअघि अमेरिकी राष्ट्रपति डोनाल्ड ट्रम्पले इरानसँग दुई दिनदेखि राम्रो र सिर्जनात्मक वार्ता भएको दाबी गरेका थिए । आफ्नै स्वामित्वको ट्रुथ सोसल सामाजिक सञ्जालमा पोस्ट गर्दै राष्ट्रपति ट्रम्पले यस्तो ‘गहिरो, विस्तृत र सिर्जनात्मक’ वार्ता आगामी सातासम्म जारी रहने जनाएका थिए ।

उनले वार्ता जारी रहेकाले इरानका ऊर्जा पूर्वाधारलाई लक्षित गरी यसअघि ४८ घण्टाभित्र गर्ने भनिएको सैन्य कारवाही पाँच दिनका लागि स्थगित गरिएको घोषणा समेत गरेका थिए । ट्रम्पको यस्तो दाबी यसबारे इरानी पक्षले खारेज गरेको हो ।

नाम उल्लेख नगरिएका वरिष्ठ सुरक्षा अधिकारीलाई उद्धृत गर्दै तस्निमले जनाएअनुसार इरानको ‘विश्वसनीय सैन्य धम्की’ पछि ट्रम्प पछि हटेका हुन् । स्रोतका अनुसार वित्तीय बजार तथा अमेरिका र पश्चिमा मुलुकको ऋणपत्रमा जोखिम उत्पन्न हुने दबाबका कारण पनि ट्रम्प पछि हट्न बाध्य भएका हुन् ।

युद्ध सुरु भएदेखि आजसम्म पनि विभिन्न मध्यस्थकर्तामार्फत् इरानसमक्ष सन्देश आइरहेका छन् । इरानले भने आफ्नो रक्षा गर्न जारी राख्ने सन्देश दिँदै आएको छ ।

हालसम्म कुनै किसिमको वार्ता नभएकोमा जोड दिँदै उक्त स्रोतले होर्मुजको जलक्षेत्रलाई युद्धपूर्वको अवस्थामा फर्किन र ऊर्जा बजारलाई स्थीर हुन नदिने इरानको अडान कायमै रहेको जनाएको छ ।