काठमाडौं– बाजुराको दुर्गम क्षेत्रबाट हेलिकप्टरमार्फत उद्धार गरिएकी एक सुत्केरी र उनका नवजात शिशुको उपचारका क्रममा मृत्यु भएको छ ।  

बडीमालिका नगरपालिका–१ सल्लेनाकी २१ वर्षीया सुरता कुमारी रोकाया र उनका शिशुको सुर्खेतस्थित प्रादेशिक अस्पतालमा मृत्यु भएको हो। 

परिवारका अनुसार, मुटु रोगबाट पीडित सुरतालाई चिकित्सकले दोस्रो सन्तान नजन्माउन सुझाव दिएका थिए । तर पुनः गर्भवती बनेपछि गर्भावस्थाको अन्तिम चरणमा उनको स्वास्थ्य अवस्था गम्भीर बनेको थियो ।

गाउँमा आवश्यक उपचार सम्भव नभएपछि उनलाई तत्काल हेलिकप्टरमार्फत उद्धार गरी सुर्खेत लगिएको थियो । अस्पतालमा चिकित्सकहरूले आमा र शिशु दुवैलाई बचाउन प्रयास गरे पनि सफल हुन नसकेको बताएका छन् ।