काठमाडौं- पाकिस्तानमा अल्पसंख्यक इसाई समुदायका व्यक्तिहरूलाई उनीहरूको गरिबी र आर्थिक कमजोरीको फाइदा उठाउँदै जबरजस्ती इस्लाम धर्म परिवर्तन गर्न बाध्य पारिएको घटनाले अन्तर्राष्ट्रिय स्तरमा गम्भीर ध्यानाकर्षण गराएको छ ।विभिन्न प्रतिवेदनहरूका अनुसार आर्थिक रूपमा विपन्न परिवारहरूलाई ऋण माफी, राम्रो रोजगारीको प्रलोभन वा सामाजिक सुरक्षाको आश्वासन दिएर धर्म परिवर्तनका लागि दबाब दिने गरिएको पाइएको छ।

विशेष गरी इँटा भट्टामा काम गर्ने मजदुर र दैनिक ज्यालादारी गर्ने व्यक्तिहरू यस्तो शोषणको मुख्य निशानामा पर्ने गरेका छन्। अधिकारकर्मीहरूका अनुसार कतिपय अवस्थामा अल्पसंख्याक समुदायका बालबालिका र महिलाहरूलाई अपहरण गरी जबरजस्ती विवाह र धर्म परिवर्तन गराउने घटनाहरू पनि बढ्दै गएका छन्।

पीडित परिवारहरूले कानुनी उपचार खोज्न खोज्दा पनि स्थानीय प्रभाव र धम्कीका कारण न्याय पाउन कठिन हुने गरेको गुनासो गरेका छन्। पाकिस्तानमा विद्यमान ईश-निन्दा सम्बन्धी कडा कानुनको डर देखाएर पनि धेरैलाई चुप लाग्न वा धर्म परिवर्तन गर्न विवश तुल्याइने गरिएको दाबी गरिएको छ।

अन्ततः यो समस्याले पाकिस्तानमा धार्मिक स्वतन्त्रता र मानवअधिकारको गम्भीर उल्लंघन भइरहेको संकेत गरेको छ। अन्तर्राष्ट्रिय मानवअधिकारवादी संस्थाहरूले पाकिस्तानी सरकारलाई अल्पसंख्यकहरूको सुरक्षा सुनिश्चित गर्न र जबरजस्ती धर्म परिवर्तन गराउने तत्वहरूमाथि कडा कानुनी कारबाही गर्न आग्रह गरेका छन्।

आर्थिक अभावलाई हतियार बनाएर गरिने यस्ता गतिविधिले समाजमा धार्मिक सहिष्णुता खलबल्याउने र अल्पसंख्यक समुदायमा त्रासको वातावरण सिर्जना गर्ने चेतावनी विज्ञहरूले दिएका छन्।