सुदूरपश्चिम– आसन्न प्रतिनिधिसभा सदस्य निर्वाचनलाई लक्षित गर्दै भारतसँग सीमा जोडिएको कैलाली जिल्लाका सबै सीमानाकामा सवारीसाधन सञ्चालनमा अस्थायी निषेध लगाइने भएको छ।

जिल्ला प्रशासन कार्यालय कैलालीले आज जारी गरेको सूचनाअनुसार फागुन २१ गते हुने निर्वाचनलाई स्वतन्त्र, निष्पक्ष र भयरहित वातावरणमा सम्पन्न गर्न फागुन १८ गते सोमबार राति १२ः०० बजेदेखि मतदान कार्य सम्पन्न नहुञ्जेलसम्म सवारी आवागमनमा प्रतिबन्ध लगाइनेछ।

सूचनामा एम्बुलेन्स, ट्याङ्कर, दमकल, दूरसञ्चार सेवा, शववाहन, अस्पताल सेवा तथा विद्युत् सेवाजस्ता अत्यावश्यक सेवा र नम्बर प्लेटमा ‘सीडी’ उल्लेख भएका कूटनीतिक नियोगका सवारीसाधन बाहेक अन्य सबै सवारीसाधन सञ्चालनमा रोक लगाइने उल्लेख गरिएको छ।

निर्वाचन अवधिभर सुरक्षा व्यवस्था कडा पारिने जनाउँदै प्रशासनले आम नागरिकलाई सहयोग र समन्वयका लागि आग्रह गरेको छ।