काठमाडौं – धादिङको बेनीघाट रोराङ गाउँपालिका–५, भैसीगौडास्थित पृथ्वी लोकमार्गमा पोखराबाट काठमाडौँतर्फ आउँदै गरेको यात्रुवाहक बस दुर्घटनाबारे छानबिन हुने भएको छ।

उक्त बस सडकबाट करिब २०० मिटर तल त्रिशूली नदीमा खस्दा १९ जनाको मृत्यु र २५ जना घाइते भएपछि गृहमन्त्रालयमा बसेको बैठकले छानबिन समिति बनाएको हो ।

गृहमन्त्री ओमप्रकाश अर्यालको अध्यक्षतामा सुरक्षा निकाय, यातायात विभाग, सडक विभाग, यातायात व्यवसायी र मजदुर संघका प्रतिनिधिहरूबीचको बैठकले दुर्घटनाको छानबिनका लागि सहसचिवको संयोजकत्वमा ५ सदस्यीय कार्यदल बनाएको हो।

गृहह प्रवक्ता आनन्द काफ्लेका अनुसार दुर्घटनाको पूर्ण विवरण र छानबिनका लागि उक्त कार्यदल बनाइएको हो ।

उता घटनाको जानकारी पाएसँगै नेपाली सेना, नेपाल प्रहरी, सशस्त्र प्रहरी बल, र स्थानीय बासिन्दाहरुको समन्वयमा घटनास्थलबाट उद्धार गरिएको थियो। मृतकहररूको शव नदी किनारबाट निकालिएको छ । घाइतेहरूलाई विभिन्न अस्पतालमा उपचारका लागि पठाइएको गृहले जनाएको छ।