भक्तपुर– भक्तपुर निर्वाचन क्षेत्र नं. २ बाट राष्ट्रिय स्वतन्त्र पार्टी (रास्वपा) का उम्मेदवार राजीव खत्रीले आफूले मतदाताबाट सकारात्मक प्रतिक्रिया पाइरहेको बताएका छन्।

सोमबार भक्तपुरमा घरदैलो कार्यक्रमका क्रममा खत्रीले परिवर्तन, रूपान्तरण र पुस्तान्तरणका लागि आफू चुनावी मैदानमा उत्रिएको उल्लेख गर्दै मतदाताले उत्साहजनक साथ दिइरहेको बताए। उनले निर्वाचनअघि सबै उम्मेदवारको हैसियत बराबर रहने तर निर्वाचनपछि जनताले नै एक जनालाई ‘हेभिवेट’ बनाउने तर्क गरे।

रास्वपाले नीति र नियतलाई सँगसँगै अघि बढाउने प्रतिबद्धता जनाउँदै खत्रीले विगतमा निर्वाचित जनप्रतिनिधिहरूले जनताका समस्या प्रभावकारी रूपमा समाधान गर्न नसकेको गुनासो आफूले घरदैलोमा सुनेको बताए।

आसन्न प्रतिनिधिसभा निर्वाचनका लागि भक्तपुर निर्वाचन क्षेत्र नं. २ मा कुल ३२ उम्मेदवार प्रतिस्पर्धामा छन्। उक्त क्षेत्रमा ९८ हजार ३५६ मतदाता रहेका छन्। तीमध्ये ६ हजार ४४५ जना नयाँ मतदाता रहेको निर्वाचन आयोगले जनाएको छ।