काठमाडौं- इरानसँग युद्धको चर्चा चलिरहँदा अमेरिकाले मध्यपूर्वमा सी–१७ ग्लोबमास्टर ३ सैन्य पारवहन विमान परिचालन गरेको छ । फ्लाइट ट्र्याकरहरुले जनवरी यता अमेरिकाले मध्यपूर्वमा नौ वटा सी–१७ ग्लोबमास्टर ३ पारवहन विमान परिचालन गरेको जनाएका छन् ।

यो विमान अमेरिकी सेनाकोे बन्दोबस्ती पारवहनको सबैभन्दा भरपर्दो माध्यम हो । सन् २००३ मा इराकमाथि अमेरिकाले हमला गर्ने बेला पनि यस्तै पारवहन विमानको सक्रियता देखिएको थियो ।

विमान निर्माता कम्पनी बोइङका अनुसार ग्लोबमास्टर ३ उच्च पखेँटा भएको, चार वटा इन्जिन जडित पारवहन विमान हो ।

यसले भारी उपकरण ओसार पसार गर्छ भने सैनिकलाई आकाशबाट सीधै जमिनमा झार्न पनि यो विमानको प्रयोग हुन्छ ।

सन् १९९० को दशकयताका विभिन्न अमेरिकी सैन्य कारवाहीमा यो विमान परिचालन गरिएको छ ।

मध्यपूर्वमा अमेरिकाले लडाकु विमानवाहक युद्धपोत, विभिन्न किसिमका लडाकु, वमवर्षक, निरीक्षण र जासुसी विमान पनि परिचालन गरेकोे छ । अमेरिकाले इरानसँग युद्ध लड्ने चर्चा चलिरहेका बेला अमेरिकी सैन्य परिचालनलाई निकै चासोका साथ हेरिएको छ ।