काठमाडौं- झापा–५ का उम्मेदवार बालेन्द्र शाहले त्यस क्षेत्रका अधुरा योजना डेडलाइनसहित सम्पन्न गर्ने प्रतिवद्धता जनाएका छन् । सोमबार सार्वजनिक गरेको वाचापत्रमा उनले उक्त विषय उल्लेख गरेका हुन् ।

‘विभिन्न कारणले अधुरा रहेका योजनाहरूलाई डेडलाइन सहित समयमै सम्पन्न गर्ने सुनिश्चितता गरिनेछ,’ वाचापत्रमा उल्लेख छ । 

निर्माण सम्पन्नपछि पनि सञ्चालनमा आउन नसकेको दमक भ्युटावर सञ्चालनमा ल्याउने उनको वाचा छ । 

‘दमक सभागृह र भ्यूटावर लगायतका योजनाहरू उच्चतम् नागरिक उपयोगिता हुने गरि सञ्चालनमा ल्याइनेछ,’ पत्रमा लेखिएको छ ।  

उक्त टावर डेढ अर्ब खर्च गरेर गत वर्ष निर्माण सम्पन्न गरिएपनि सञ्चालनमा आउन सकेको छैन । उक्त टावर निर्माणका लागि पूर्वप्रधानमन्त्री तथा झापा–५ का एमाले उम्मेदवार केपी ओलीले पहल गरेका थिए । 

उपयोगिता यकिन नगरी टावर निर्माण गरेकोमा उनको अहिले आलोचना समेत हुने गरेको छ । दमकलाई पूर्वी नेपालको आइ.टी.हव. बनाउन आवश्यक पूर्वाधार र नीतिगत व्यवस्था गर्ने उनले उल्लेख गरेका छन् । 

यस्तै दमक–रवि–चिसापानी सडक, स्थानीय पहिचान झल्कने रगंशाला, विराट बुद्ध पार्क, तटबन्ध लगायत निर्माण गर्ने उनले पत्रमा उल्लेख गरेका छन् । 

‘विराठ बुद्ध पार्कको निर्माण कार्य सम्पन्न गरी सञ्चालनमा ल्याइने, रतुवा खोला, तथा सहायक खोला, खहरेको तटबन्ध निर्माण गरी कटान र डुबान नियन्त्रण गर्ने, ग्रामीण सडक, लिंक रोड र पुल स्तरोन्नति गरी यातायात समय र ढुवानी लागत घटाउँदै समग्र कनेक्टिभिटी सुदृढ गरिनेछ,’ उल्लेख छ ।