काठमाडौं – नायिका पूजा शर्मा फिचर्ड आइटम डान्स खिचेपछि फिल्म ‘कल्ली’को सुटिङ पूरा भएको छ ।

फिल्मका निर्माता किरण नेपालीका अनुसार चोभारमा सेट लगाएर दुई दिन खिचेपछि पूजाको आइटम डान्सको सुटिङ सकिएको हो । ६० दिनको तालिकामा छायाङ्कन पूरा भएको निर्माता नेपालीले बताए ।

पूजाले ‘क्या राम्री’ बोलको गीतमा आइटम डान्स गरेकी हुन् । पूजाले पहिलो पटक आइटम डान्स गरेकी हुन् ।

गत मंसिरमा विवाह गरेकी पूजा यही आइटम डान्सबाट फिल्मकर्ममा फर्किएकी हुन् ।

उनी भन्छिन्, ‘करिअरमै पहिलो पटक आइटम डान्स गरेकी छु । प्रतिक्रियाका लागि उत्साहित छु ।’

उनको आइटम डान्स भएको भिडियो चाँडै सार्वजनिक गर्ने तयारीमा निर्माण पक्ष रहेको छ । गीतमा गायक अशिष अविरल र गायिका मेलिना राईको स्वर रहेको छ ।

नायकहरु उत्तम प्रधान, सौगात मल्ल, अर्पण थापा, नायिकाहरु बेनिशा हमाल र वर्षा राउत शीर्ष भूमिकामा रहेको यस फिल्मको छायाङ्कन जुम्लामा गरिएको छ ।

यो फिल्मको लेखक महेश दवाडी हुन् । प्रदर्शन मिति फागुन १ लाई तोकिएको छ ।