काठमाडौं- राष्ट्रिय प्रजातन्त्र पार्टीबाट रुपन्देही क्षेत्र नम्बर २ मा प्रतिनिधि सभाकी उम्मेदवार कर्भिका थापाले उम्मेदवारी फिर्ता लिएकी छन्।

उनले अमेरिकी पीआर लिएको स्वीकार गर्दै उम्मेदवारी फिर्ता लिएकी हुन्। अध्ययनका क्रममा अमेरिकी पीआर लिएकी उनले त्यो तागेको समय तीन महिना पूरा नभएपछि संविधानत: उनी उम्मेदवार हुन अयोग्य हुन्। उनी राप्रपा नेता निरञ्जन थापाकी छोरी हुन् ।

नेपालको संविधानको धारा २९१ अनुसार विदेशमा बस्दा लिएको स्थायी आवास अनुमति (पीआर) त्यागेको तीन महिना पूरा भएपछि मात्रै उम्मेदवारी दिन पाउने कानुनी व्यवस्था छ । उक्त अवधि पूरा नभइसकेकाले उम्मेदवारीबा पछि हटेको बताएकी छन् ।

उनलाई पार्टी केन्द्रले नै उम्मेदवारीबाट पछि हट्न सुझाएको थियो । उनले पार्टी निर्देशनपछि संविधानको मर्म र भावनाअनुसार उम्मेदवारी फिर्ता लिएको जानकारी वक्तव्य निकालेर दिएकी छन् ।

थापाले पढ्न जाँदा अमेरिकामा स्थायी आवास अनुमति पत्र लिए पनि नेपाली नागरिकता र राहदानी यथावत रहेकी बताएकी छन् ।